Zaharaddeen Ishaq Abubakar | Katsina Time
16 ga Yuni, 2025 | Gidan Gwamnatin Jihar Katsina
Gwamnatin Jihar Katsina ta sake jaddada matsayinta na kin sasantawa da ’yan ta’adda ko ’yan bindiga da ke addabar al’umma a sassan jihar. Wannan bayani ya fito ne daga bakin Kwamishinan Tsaro da harkokin cikin gida na jihar, Hon. Dr. Nasiru Mu’azu Danmusa, a yayin wata ganawa da manema labarai a ofishinsa da ke kusa da Gidan Gwamnatin Jihar Katsina, ranar Litinin, 16 ga Yuni, 2025.
Dr. Danmusa ya bayyana cewa duk da gwamnatin ba za ta zauna da ’yan bindiga don tattaunawa ba, tana maraba da duk wanda ya ajiye makamansa da niyyar komawa rayuwa mai tsafta da lumana.
“Matsayin Gwamnatin Jihar Katsina, karkashin jagorancin Mai Girma Gwamna Dikko Umaru Radda, ya kasance a fili cewa: ba za mu sasanta da ’yan bindiga ba. Amma duk wanda ya ajiye makamansa da gaskiya, za mu ba shi damar komawa cikin jama’a ya rayu kamar kowane dan kasa,” in ji shi.
Kwamishinan ya ce an samu ci gaba mai ma’ana a wasu kananan hukumomi da ke fama da rikici kamar Jibia, Batsari da Danmusa, inda jagororin al’umma suka fara tattaunawa da wasu daga cikin ’yan bindigar da suka aiko da wakilai domin neman sulhu.
“Ba shugabannin kananan hukumomi ba ne ke tattaunawa da ’yan bindiga, sai dai shugabannin al’umma wadanda suka fi sanin halin da ake ciki a yankunansu. A Jibia da Batsari, wasu daga cikin ’yan bindigar sun tuntubi shugabannin al’umma, kuma alhamdulillah, an samu zaman lafiya daga wannan kokari,” a cewarsa.
Ya jaddada cewa shugabannin al’umma su ne suka fi dacewa da irin wannan tattaunawa tun da wasu daga cikin ’yan bindigar ’ya’yansu ne ko kuma ’yan uwansu, lamarin da ke saukaka fahimta. Gwamnati kuma tana daukar mataki bisa ga rahoton da al’umma suka bayar.
Dr. Danmusa ya kuma yaba da hadin kai daga wasu kananan hukumomi kamar Kankara, Faskari, Sabwa, Safana da Dandume, wadanda suka dage wajen yaki da matsalar tsaro. Ya bayyana cewa rundunonin tsaro za su ci gaba da kai farmaki a wuraren da har yanzu ake fama da hare-haren ’yan ta’adda.
Kwamishinan ya ce gwamnatin jihar ba ta rattaba hannu a kowanne yarjejeniya da ’yan bindiga ba, kuma ba ta sanya sharadi ba saboda tana bin tsarin "daga kasa zuwa sama" wajen gudanar da harkokinta.
"Ba mu tilasta wa kowa komai ba. Kuma ba mu shiga kowace yarjejeniya ba. A karkashin wannan gwamnati, muna ba al’umma dama su bayar da shawarwarinsu da mafita. Wannan gwamnati na aiki da tsarin shawarwarin al’umma daga tushe,” in ji shi.
Ya kara da cewa da zarar al’umma sun tabbatar da zaman lafiya, gwamnati na iya dakatar da farmakin sojoji a yankunan, sai dai idan ’yan bindigar sun saba alkawari za a dawo da matakan soja kamar da.
“Idan kuma sun karya alkawari, to gwamnatin za ta dauki matakin da ya dace,” ya jaddada.
Dr. Danmusa ya bayyana abubuwan da ke faruwa a wasu kananan hukumomi a matsayin ci gaba mai kyau, yana fatan tsarin sulhu daga tushe zai yadu a sauran yankuna da ke fama da matsalolin tsaro.
“Muna fata wannan ci gaba da aka samu a wasu yankuna zai yadu zuwa sauran kananan hukumomi. Wasu daga cikin wadannan ’yan bindigar ma ’ya’yanmu ne ko kuma ’yan uwanmu, don haka akwai dama ta fahimtar juna idan al’umma ne suka fara maganar sulhu,” in ji shi.
A karshe, Dr. Danmusa ya tuna da irin kudurin Gwamna Dikko Radda game da tsaro, inda ya bayyana cewa “tsaro ne matsayi na daya, biyu, da na uku” a jerin fifikon gwamnatinsa.
Gwamnatin jihar tana ci gaba da hada kai da shugabannin al’umma, hukumomin tsaro, da kananan hukumomi domin tabbatar da ingantaccen tsarin yaki da rashin tsaro tare da tabbatar da zaman lafiya mai dorewa a Katsina.
